FANDOM



RegestBearbeiten

1394. Juni 24. Stockholm. 12669. Die Hauptleute der Vitalienbrüder stiften eine ewige Messe zu
Stockholm.

QuellentextBearbeiten

Witliken se alle den genen, de dessen opene breffe seen efte lesen,
dat wy her Ranibold Sanewitze, her Bosse van deme Kalende, riddere, Arnd Stüke, Clawus Mylges, Marquard Preen, Hartwich Sedorpe, Lyppold Rumpeshaghen, Hinrik Lüchowe, Bertram Stokeled unde schypher Joseph, knapen,
mit volborde unde nach rade der guden lude altomale, de syk met uns
bestallen leten openbare in dem yse vppe der Yoerden by Dalerne, stichteden
unde hebben gemaket, vppe tokamende gnade vnses lyuen heren koning
Albertis to Sweden, unde de na em konyng mach werden, ene eweghe mysse
met unsen eghene gude unde met gudere lude hulpe, gode to loue, in de ere
des hylghen crucis, des hylghen blodes, sunte Jurygen, sunte Gertrud unde
alle godes hylghen, in de buykerken to deme Stokholme, unde louen darmede
gode, de reyne küsche maghet Marien unde alle godes hylghen darumme,
dat uns de benedygede god met syner gotleken gnade wol beschermede unde
bewarede vore vnse vygende. Unde watte almesen und rente gemaket wert
to dere myssen, de lene wi hern Johanne Osterburghe, prystere, enen be-
wyser desses ieghenwardeghen breues, lutterleken, dere god to bruken syn
levedaghe; unde dar schal he gode van denen unde holden mysse unde bidden
vore unsen lyuen heren den konynge, vor de synen, vor uns altomalen unde
vore alle de gene, de de myssen helpen beteren und sterken met worden,
met willen unde met werken. Des to enere gansen wyssen vestunge hebbe
wy vorbenomeden unse ingeseghelen, ein ieslik dat syne besunderen, hengen
laten vor dessen breeff to thüge, de gescreuen is to deme Stokholme, na godes
bord dusent iaare drehundert iaar darna in deme vyerundenegenteghesten
iaare, in sunte Johannis baptisten daghe to mydesomere.

Aus Suhm, Hist. af Danm. 14, 8. 585 — 586, nach einer Abschrift vom Original im Königl.
Geh. Archive zu Stockholm. — Gedruckt (aus Suhm) auch Jahrb. 16, S. 249 f.

EinzelnachweiseBearbeiten

Urkunde+Stockholm