FANDOM


Regest

Graf Albrecht von Holland urkundet am 15. August 1400 über einen mit acht Hauptleuten der Vitalienbrüder geschlossenen Vertrag, in welchem er insgesamt 114 Vitalier in sein Geleit nimmt.

Quellentext

Aelbrecht etc. doen cond allen luden, dat wii een voerwaerde gedadingt ende gemaect hebben mit Herman Haweupe, Johan Stortebeker, Hinrich Corte, Jan Velhove, Otto Rover, Tiderich Hogezee, Yesse Dene ende Gudemont Janneszon van hore gemeenre vitalgebroedere wegen tot hindert ende 14 manne toe, ende die bescreven over te leveren in deser manieren, dat wii se tot onser vriensscap nemen ende gheven him luden een goet, vry, vaste ende zeker geleide, vrylich te comen, te varen, te marren, te keren ende te wesen overal in onsen landen, so waer dats him gevoecht. Voert so sullen dese voersc[reven] vitalgebroeders vyant wesen alle der geenre, die onse vyande siin, dars te verstaen: die Ostvriesen van Westergo ende van Ostergo toter Lauwers toe, dier van Grueningen, dier van Hamborch ende anders die ghene die over die Lauwers geseten siin, ende wii mit recht veeden mogen. Ende war gevangen, scepe of enigerhande goede dese voers[eiden] vitalgebroeders in den onsen brengen sullen, die sullen sii vriliken daer gebruken ende voeren daer sii willen ende daer of beschermt wesen, up dat zi se up onse vyande voergen[ompt] genomen hebben. Voert so en sullen sii van ons noch van onsen ondersaten niet vervolcht noch bescadicht werden, sii en sullen eerst in der zee up horen vryen wege wesen. Dese voers[creven] voerwaerden sullen ingaen upten date des briefs ende gedueren een quart[al] jaers daer naest volgende ende darentenden 14 dage lang na onsen wederseggen, dat wii den voers[eiden] vitaelgebroeders mit onsen brieven wederseggen sullen ende te weten laten, ende alle ding sonder arglist. Ende om dat wii den selven vitalgebroedres geloeft hebben ende geloven mit desen brieven te houden ende te doen houden alle pointen ende voervaerden, geliic voerscreven is, soe hebben wii in getugenisse daer of desen brief doen besegelen mit onsen segel hier aen gehangen. Ende hebben om die meerre zekerheit willen bevolen onsen get[r]uwen, den here van Vrederode, den here van Wassenaer, heren Gheriit van Egmonde ende heren Ghiiskiin van Dieoenborch, dat sii desen brief mit ons besegelen. Ende Johan here tot Vrederode, Filips here van Wassenaer ende burchgrave van Leyden, Gheriit van Egmonde ende Ghiiskiin van Diepenborch ridders hebben bi bevelen van onsen lieven genadigen here voirn[ompt] desen brief mit him besegelt in getugenisse alle der voerwaerden voerscreven mit onsen segelen hier aen gehangen. Gegeven tot Harlem up onser v[r]uwen dach assumpcio anno 1400.

Einzelnachweise