Regest
Aufzeichnung über einen mit den Seeräubern geschlossenen Stillstand [1382 Mrz. 16.]
Quellentext
"Dahge syn genohmen bette to unser irsten vrouwen dahge mit den, de hiir na screven stan, also: Henneke Grubendael, dar heft vor lovet Henneke Molteke unde Cort Molteke; vor Vicken Grubendael heft ghelovet Claus Stopenicze unde Velthuzen; dusse sulven dre hebben ghelovet vor Henneken von Ortze(n); vor Hinric Wartberghe unde vor Paschedage heft ghelovet syn veddir Frederic Wartbergh unde Langhe Borchard Schynkel. De hiir na screven stan, hebben enen vrede bette to lichtmissen: Detlev Knut, dar heft vor lovet Lodewych, Eler Ranczowe, dar heft vor love(t) Wolter Eltenae; Ludeke Scinkel, dar heft vor lovet Borchard Scinkel; vor Swarte Schonighe lovede Hinric Andersson. Dyt lovede von en allen hebben vor dussen vrede untfanghe to der stede hand: her henning von Pudbusk droste, her Deghenhart Bugghenhagen, Cort Molteke de eldere, unde de rat von den stedin, (de) dar weren: van Lubic her Symon Zwerting, her Herman Ozenbrugge; van Rostok her Johan van der Ae unde her Hinric Wytte; von dem Sunde her Bertram W(u)lflam unde van der Wysmer her Hinric Wessel. De hebben dussen loveren unde zeroveren weddir ghelovet van der stede weghen. De yenen, dar wy den corteren dach mede ghenomen hebben, also vorscreven is, de haddin gerne le(n)ghern dach ghehat, men dar umme, dat se mest hebben to verlesende, so wolde wy en nynen le/n)ghern dagh geven, men to unser vrouwen daghe, wente it denne noch vro noch is, weret, dat gy en umme jwen scadin wat dochten to duende. Den anderen, de nicht to verlesende hebben, hebben wi dach ghegeven bette zo lich(t)missen. Unde dar na we deme anderen wat duen wyl, de sal den vreden tovoren ver weken upseghen: de serovere sollen den vreden upseghen dem rade to Lubic eddir to dem Sunde, unde wyllen de stede den vrede upseghen, so sullen se ere brive, dr se den vrede mede upseghen wyllen, deme drosten scriven, de sal ze geven malk den synen."